Самостојниот синдикат на новинари и медиумски работници (ССНМ) подготви колективен договор за системско решавање на проблемите во медиумската индустрија. Договорот предвидува регулирање на сите прашања што произлегуваат од работата на еден медиум како плати, работно време, начин на напредување, избор на уредници, како и правото на слободно и професионално работење.
– Овој колективeн договор е резултат на речиси една година подготовки, дебати, консултации со претставниците на медиумската сфера и со сите засегнати страни за тоа како системски да се решат проблемите во кои се наоѓаат медиумите. Додека работиме со казни и со притисоци, нема да известуваме балансирано и професионално. Колективниот договор ги регулира материјалните и нематеријалните права на вработените и го регулира статусот на тие што не се вработени – вели Тамара Чаусидис, претседателка на ССНМ.
Чаусидис вели дека според договорот, основната плата за медиумски работник со работно искуство од една до пет години треба да е државниот минимум што моментално е 20.000 денари. Освен тоа, договорот предвидува и минимални хонорари, статусот на хонорарците да не биде поголем од една година, а приправничкиот стаж да не биде повеќе од шест месеци.
– Со договорот меѓу другото сакаме да ја вратиме и функцијата ментор во редакциите, да бидат заштитени авторските права, да е предвиден минимален хонорар, да нема одработување на одморот кој е законски загарантиран, да има флексибилно работно време и да го заштитиме работникот од системски мобинг – додава Чаусидис.
Наредни чекори, вели Чаусидис, се лобирањe и преговарање кај работодавците за да го потпишат колективниот договор со ССНМ и со тоа да се врати достоинството на професијата.
– Ние дојдовме во ситуација нашата професија да биде омаловажена, дискредитирана, понижена, а ние сега треба да ѝ го вратиме достоинството, но не со закон зашто законот го носат политичарите, а тие не се заинтересирани за нашите позиции. Сега имаме готов документ со кој ќе тропнеме на врата кај работодавците за да ги регулираме односите. Сакаме успешни, профитабилни и силни медиуми – рече Чаусидис.
