Претседателот на Сојузот на синдикати на Македонија (ССМ), Живко Митревски, поднел кривична пријава против министерката за труд и социјална политика од СДСМ, Фросина Ташевска-Ременски, и против пет други лица за злоупотреба на службената положба и овластување.
Според Митревски, врз основа на фалсификуван документ за донесена одлука од наводно одржана седница на Советот на ССМ, Ременски донела решение за негова смена од претседателското место.
Митревски вели дека се работи за заговор, обид за пуч и за невиден преседан во историјата на синдикалното организирање во Македонија.
– Техничката министерка Фросина Ташевска-Ременски во координација со четири претседатели на гранкови синдикати, направи обид за пуч и за насилна промена на претседателот на Сојузот на синдикатите на Македонија и на раководството на ССМ, што е историски скандал од невидени размери, спротивно на основните демократски вредности и на меѓународните стандарди за автономност во синдикалното дејствување. Незаконското и кривично поткопување на органите во ССМ беше спроведено со користење фалсификувана и некомплетна документација – рече Митревски.
Митревски поднел кривични пријави и против вработен во ЈП „Комуналната хигиена“, кој го потпишал документот, и против четворица претседатели на гранкови синдикати.
Тој од Ременски побара оставка од министерската функција.
