Екстерното тестирање има голем број нерегуларности и технички пропусти, а поради тоа учениците ќе бидат оштетени и деградирани, велат од „Средношколски пленум“.
– Четврти ден како една од најлошите реформи во образованието во Македонија се спроведува и оваа година. Голем број нерегуларности, нелогичности, технички пропусти го следат овој процес и оваа година, за што до „Средношколски пленум“ се пристигнати поплаки од голем број средношколци. На пример, има прашање на албански јазик, а одговори дадени на македонски јазик или има прашање на албански јазик и еден одговор на англиски јазик, а други одговори немаме. Сакаме да го прашаме министерот Адеми дали екстерното тестирање треба вака да изгледа и дали е ова тоа екстерното тестирање што тој ни го ветуваше нам, средношколците, и на целокупната јавност во Македонија. Она екстерно тестирање на кое нема да има нерегуларности и технички пропусти. Дали не му е малку срам дека поради некои грешки од министерството, учениците ќе бидат оштетени и деградирани – вели Александар Милески од „Средношколски пленум“.
Од пленумот велат дека иако откако е почнато тестирањето до нив се поднесени голем број приговори, тие очекуваат дека откако ќе бидат објавени резултатите да добијат зголемен број поплаки.