Средношклоците денеска во 12 часот ќе протстираат во повеќе градови низ Македонија против, како што велат, лошите реформи во образованието. Маршот во Скопје ќе почне кај фонтаната во Градски парк, а ќе заврши пред Министерството за образование.
„Да се собереме во што поголем број за да го искажеме нашиот револт кон лошите реформи. Бараме враќање на стариот концепт на матура и мирување на законот за екстерно тестирање. Време е да го отфрлиме туѓото влијание бидејќи образованието ни припаѓа нам. Време е да покажеме дека нема да дозволиме да го уништат образовниот систем за нас и за идните генерации. Затоа дојдете и придружете се“, велат од „Средношколски пленум“.
Од неформалната средношколска организација додаваат дека на маршот ќе биде забрането истакнување партиски, религиозни и етнички симболи, секаков вид вандализам, палење учебници, уништување јавен имот, насилство и говор на омраза, како и користење алкохол, опојни дроги, оружје и пиротехника.
