Шефот на македонската дипломатија во заминување, Никола Попоски, денеска се сретна со шефот на делегацијата на Меѓународната алијанса за сеќавање на Холокаустот (ИХРА), амбасадорот Јан Дебоут.
На средбата, како што соопштуваат од македонското МНР, било разговарано за активностите што ги спроведува Меѓународната алијанса, како и за активностите што се спроведуваат во Република Македонија на планот на сеќавањето, образованието и истражувањето на Холокаустот.
Попоски изразил задоволство од испраќањето на висока делегација на ИХРА првпат во Република Македонија, по повод 11 Март, Денот на депортација на Евреите од Македонија, во пресрет на кој ќе се одржат комеморативни настани во Скопје и во Битола.
Како што се наведува во соопштението, на средбата биле искажани и заложбите од нашата држава и од ИХРА во светло на можно станување на полноправна членка на Република Македонија во оваа алијанса.
ИХРА е меѓувладино тело кое служи како платформа каде што претставници на владите на нејзините земји членки, како и национални и меѓународни експерти разменуваат идеи и искуства во врска со политиките на планот на сеќавањето, образованието и истражувањето на Холокаустот во светот.
Во ИХРА членуваат 31 држава, а застапени се и 11 држави со статус на набљудувачи, меѓу кои и Република Македонија.
