Во рамките на дводневната официјална посета на Македонија, турскиот премиер Ахмет Давутоглу имаше тет-а-тет средба со својот домаќин, премиерот Никола Груевски. По средбата, на прес-конференција Груевски истакна дека Република Турција е долгогодишен пријател на Македонија и безрезервно ја поддржува земјата во евроатланските аспирации.
– Ние го почитуваме фактот што Република Турција дава принципиелна и вредносна поддршка на нашите државни и национални интереси. Со мојот колега, со задоволство констатиравме дека е направен напредок во досегашните напори, не само во политичката, туку и во економската соработка – рече Груевски.
Двајцата премиери се согласни дека економската соработка треба да се унапредува, а интенција е во наредниот период трговската размена да изнесува повеќе од една милијарда долари.
– Нашата трговска размена во првите десет месеци изнесува 375 милиони долари, меѓутоа до крајот на годината очекуваме да изнесува 450 милиони. Одлучни сме во најскоро можно време таа да достигне една милијарда – изјави Давутоглу.
Попладнево турскиот премиер ќе има средба и со претседателот Ѓорге Иванов, а ќе одржи и предавање во Министерството за надворешни работи.
