Првата транша за Македонија во износ од 80 милиони евра, од вкупните 160 милиони евра макрофинансиска помош од ЕУ за надминување на кризата од корона вирусот, ќе биде префрлена следната недела. Ова беше посочено на првата официјална средба на министерот за финансии, Фатмир Бесими, со амбасадорот на Европската Унија во земјава, Дејвид Гир.

Како што соопшти Министерството за финансии, дополнително, ЕУ во рамки на Договорот за отпорност, обезбеди 40 милиони евра, грант средства. Тие ќе се наменат за нови бескаматни кредитни линии и грантови за поддршка на мали и средни компании, како и за поддршка на невработени лица.

Министерот Бесими на средбата ја истакнал силната определба на нашата земја за членство во Унијата, како и подготвеноста за спроведување на реформите.

„Ефикасно и ефективно управување со јавните финансии е услов за пристапување на земјата во ЕУ и ние во моментов сме фокусирани на креирање систем кој ќе овозможи стратешко буџетско планирање на долг рок и мерење на резултатите преку индикатори за успешност. Особено сме посветени на имплементација на структурните реформи за подобрување на конкурентноста и креирање работни места, во рамки на подготовка на Програмата за економски реформи, како предуслов за подобрено економско управување. Тоа е еден од фундаментите во евроинтегративниот процес“, рече Бесими.