Одборот за надворешни работи на српското собрание го прифати предлогот на владата за формирање фонд за Западен Балкан, а дел од опозицијата предупреди дека тоа е еден чекор поблиску кон признавање на независноста на Косово.
Целта на основањето на овој фонд е зајакнување на врските и поттикнување на евроинтеграциите на Албанија, БИХ, Црна Гора, Косово, Македонија и на Србија, како и за заедничко претставување на трети земји.
Пратениците на Српската радикална партија и на Демократската партија на Србија побараа овој предлог да се повлече од собраниска процедура. Тие тврдат дека предлогот е противуставен и дека со Косово не може да се потпишуваат меѓународни договори, бидејќи според нив „Косово не е држава“.
Во министерството за надворешни работи на Србија објасниле дека договорот е формулиран на начин со кој станува јасно дека Косово е територија под меѓународно управување во состав на Србија.