Владата на Србија денеска соопшти дека нема да се откаже од барањето за испорачување на еден од поранешните команданти на ОВК, Рамуш Харадинај, тврдејќи дека има 30 нови сведоци и проширена истрага против него.
– Се надеваме дека француските правосудни органи постапуваат професионално и во склад со меѓународните закони и дека ќе ни го испорачаат Харадинај за постапката против него да заврши пред органите на Србија – рече министерката за правда на Србија, Нела Кубуровиќ, на прес-конференција по седницата на владата која беше посветена на случајот со Харадинај.
Според нејзините зборови, Србија на Франција ѝ испратила „три големи регистри“ во кои се наоѓаат исказите на сведоците, ДНК-анализи, потврди за смрт, како и правосудни пресуди од судот во Белград. Таа рече дека Србија го товари Харадинај за злосторства сторени во текот на 1999 година над цивилно население, додека Хашкиот трибунал го ослободи по обвиненијата за дела во периодот од март до септември 1998 година.
Директорот на канцеларијата на владата на Србија за Косово, Марко Ѓуриќ, рече дека на барањето на Србија за испорачување на Харадинај се наоѓаат работи кои не се спомнати во Хашкиот трибунал и за кои Харадинај таму не суден.
Тој рече дека во обвинувањата против Харадинај се наведени убивања и силувања, но не само на Срби, туку и на лица од други националности.
