Србија ќе испрати хуманитарна помош во храна, опрема и лекови за граѓаните на Алепо во Сирија преку руски авиони.

Српскиот премиер Александар Вучиќ денеска во Ниш изјави дека владата на Србија одлучила да испрати хуманитарна помош за жителите на Алепо и дека во тоа нема никаква „политичка приказна“.

Тој додаде дека српската влада би испратила хуманитарна помош кому било во светот што би побарал и дека не разбира зошто околу ова прашање се крева голема врева.

Српските медиуми претходно информираа дека помошта ќе биде испратена преку Српско-рускиот хуманитарен центар во Ниш со руски авиони.

Медиумите исто така наведоа дека повикот на Русија за и Србија да се приклучи кон хуманитарната акција следувал во исто време кога и германската канцеларка Ангела Меркел ги повикала членките на ЕУ да ги заострат санкциите кон Русија поради улогата во сириската војна.

Како што јавува дописникот на „Мета“ од Белград, во пакетите со помош што ги подготвиле министерството за одбрана и војската на Србија имало десет тона масло за јадење, брашно, шеќер, како и гардероба, чевли, лекови, потрошен медицински материјал и електроагрегати.