VMRO-DPMNE-ja vlerëson se incizimet nga bisedat e përgjuara që sot i publikoi lideri i LSDM-së Zoran Zaev janë të montuara dhe të prera, nuk kanë relevancë dhe nuk dëshmojnë asgjë.
“Zoran Zaev prezantoi materiale të drejtuara dhe të prera, të cilët nuk tregojnë asgjë kriminale dhe asgjë nuk është në pajtueshmëri me ligjet. Fjalimi i tij hyrës paraqet manipulim dhe kahëzim në një kontekst tërësisht të gabuar i cili vetëm atij i përgjigjet”, thuhet në reagimin me shkrim të VMRO-DPMNE-së.
VMRO-DPMNE-ja hedh poshtë akuzat se kryeministri ka blerë automjet luksoz.
“Automjeti nuk është i Nikolla Gruevskit, por pronë e Republikës së Maqedonisë, më saktësisht e Ministrisë së Punëve të Brendshme dhe përdoret për shërbim të mysafirëve të lartë të huaj, delegacioneve dhe politikanëve, që është përdorur edhe deri më tani. Automjeti është i blinduar gjë që e sqaron vlerën tij. Për shkak të faktit se automjeti me të cilin udhëton kryeministri është mbi 20 vjet i vjetër, automjeti i ri përdoret gjatë vizitave të kryeministrit jashtë Shkupit, ose në raste kur automjeti i vjetër është për riparim ose për servisim, shkruan në reagim.
Sipas VMRO-DPMNE-së, të gjitha pohimet e Zaevit janë spekulime, të pavërteta dhe gënjeshtra.
