Ndërmjetësi belg Piter Vanhoute sot para fillimit të takimit të grupeve të punës tha se, sipas tij, ka mundësi të arrihet marrëveshje për Ligjin e mediumeve dhe se është mirë që partitë politike ofrojnë propozime, që janë zgjidhje finale e jo vetëm propozime.

Ai konfirmoi se me disa nga propozimet ka problem sepse nuk janë sipas standardeve të BE-së. Vanhoute gjithashtu shtoi se nuk ka marrëveshje formale për metodologjinë për pastrimin e listës zgjedhore, por është i kënaqur që mund të thotë se KSHZ bën çmos që të realizohet pastrimi i listave.

Duke u përgjigjur në pyetje të gazetarëve, ndërmjetësi belg tha se nëse nuk ka kohë të mjaftueshme që të përgatiten zgjedhjet, sipas tij, atëherë mund të ketë zgjedhje problematike. Sipas tij, përgjegjësinë e kanë pushteti dhe opozita ndërsa koalicioni qeverisës duhet t’i krijoj kushtet për zgjedhjet, tërheqëse për opozitën.