Shoqata e studentëve të diplomuar nga universitetet turke në Maqedoni reagoi ndaj keqkuptimeve lidhur me lajmet e publikuara në një pjesë të mediave lidhur me ndërprerjen e marrëveshjes për pranim të dyanshëm të diplomave me Turqinë.
Nga kjo Shoqatë thonë se janë ndërmarrë të gjitha hapat e nevojshme dhe u bëjnë thirrje palëve t’i kenë parasysh vetëm informacionet e dhëna nga institucionet zyrtare.
“Vërejtëm se lajmet lidhur me ndërprerjen e marrëveshjes dypalëshe për pranim të ndërsjellë të dëftesave, diplomave, kualifikimeve, nivelet shkencore dhe profesioneve të fituara në Republikën e Maqedonisë dhe Republikën e Turqisë, nga ana e Republikës së Turqisë, krijoi shqetësim në radhët arsimore dhe në mesin e studentëve dhe prindërve. Nga momenti kur këto lajme u publikuan, Shoqata e studentëve të diplomuar nga universitetet turke ndërmori hapat e nevojshme dhe kontaktoi institucionet në shtetin tonë dhe në R. e Turqisë. Duke pasur parasysh dezinformatat që qarkullojnë në opinion, duam të theksojmë rëndësinë që të qëndrojmë të qetë dhe u bëjmë thirrje të mos i merrni parasysh shpjegimet përveç atyre që janë dhënë nga institucionet zyrtare”, thonë Ismail Aliji dhe Xheladin Xhuli, ko- kryetarë të kësaj Shoqate.
