Këshilli penal i Gjykatës themelore Shkupi 1 i refuzoi katër ankesat e para të Katica Janevës, me çka përfundimisht konfirmohet se Mile Janakievski, Edmond Temelko dhe dy persona tjerë do të mbrohen në liri derisa zgjatë hetimi për rastin “Titanik”.
Vendimin e këtillë nga Gjykata e njoftuan rreth orës 18:00, edhe pse i njëjti pritej më herët gjatë ditës për shkak të afateve ligjore. Ndërsa nga Gjykata thonë se çdo gjë është bërë në kohë. As për vendimet e as për afatet, të paktën sa për fillim nuk ka reagim nga PSP. Ndërsa prej nesër priten vendime të reja për paraburgimet që i kërkoi Katica Janeva. Sipas paralajmërimeve nga Gjykata do të vendoset për ankesat e Prokurorisë speciale, pasi në instancë të parë iu refuzuan kërkesat për paraburgim për Gordana Jankullovskën, Kiril Bozhinovskin, Ismet Gurin dhe dy persona tjerë.
Pas tyre, siç thonë nga Gjykata për “Meta”, Këshilli penal do të vendos në mënyrë plotësuese sepse afatet ligjore edhe më tej vazhdojnë.
