Në aksionin e sotëm, ekipet të sektorit për shkatërrimin e krimit të organizuar pranë MPB-së kanë kryer bastisje në dhjetëra objekte të fshatit Vaksincë të Kumanovës ku kanë zbuluar 128 emigrantë, të cilët ilegalisht janë akomoduar në një pjesë të tyre- njoftoi në konferencën e sotme për shtyp zëdhënësi i këtij resori, Ivo Kotevski.
Pjesa më e madhe e tyre vijnë nga Siria, Iraku dhe vendet tjera të Lindjes së Mesme.
Krahas emigrantëve në aksion është gjetur edhe një banor 68 vjeçar i f. Vaksincë, i cili është kërkuar me fletë- arrest për dënim me burg për vrasje.
“Emigrantët ilegal janë zbuluar në pesë prej dhjetë objekteve të bastisura. Sipas njohurive të deritanishme, pronarët e objekteve i kanë dhënë me qira me çmime prej mesatarisht 1500 euro në muaj, varësisht se për çfarë objekti bëhet fjalë ose nëse vet i kanë pranuar emigrantët ilegal, u kanë paguar pesë deri dhjetë euro vetëm që të akomodohen në objekt, pa u dhënë krevat për paratë që i kanë paguar”, tha Kotevski.
Sipas MPB-së, nga bisedat me emigrantët, ata kanë njoftuar se të gjithë kanë ardhur në Vaksincë me vullnetin e tyre.
Ata në vend hyjnë përmes Greqisë dhe qëllimi i tyre final është ndonjë prej vendeve të BE-së.