Ministri i brendshëm, Agim Nuhiu ka njoftuar Shoqatën e Gazetarëve të Maqedonisë se janë arrestuar disa persona për shkak të sulmit ndaj ekipit të “A1on” gjatë protestës së lëvizjes “Për Maqedoni të përbashkët”.
Pjesëmarrës në protestë kanë sulmuar kameramanin Vladimir Zhelçeski dhe gazetarin Aleksandar Todevski, duke u shkaktuar lëndime trupore ku si pasojë që të dy kanë përfunduar në Qendrën e urgjencës në Shkup.
Ministri theksoi se po punohet në zbardhjen e rastit, por se nuk tregon se persona janë arrestuar dhe ku janë gjetur.
Kryetari i SHGM-së, Naser Selmani sonte dënoi sulmin dhe për këtë incident akuzoi liderin e VMRO DPMNE-së, Nikola Gruevski.
“Ky është kulmi i asaj që po ndodh në katër vitet e fundit. Pushteti i Nikola Gruevskit në mënyrë të koordinuar sulmon gazetarët, me qëllim që mos të ketë informim objektiv për gjendjen në Maqedoni. Dua ta porosis kryetarin e VMRO DPMNE-së që t’i tërheq dhunuesit e tij”, tha Selmani duke shtuar se madje edhe VMRO DPMNE të mos ketë asgjë me këtë sulm, partia drejtpërdrejtë ndikon ndaj atmosferën me atë që nuk i sanksionon sulmet.
