LSDM dhe partnerët sot do të firmosin platformë për Maqedoni demokratike. Siç thonë nga partitë, me firmosjen e kësaj platforme, partnerët e koalicionit obligohen për veprim të përbashkët dhe pa kompromis në mbrojtjen e funksionimit ligjor dhe kushtetues të vendit.
Firmosja e platformës vjen pas takimit të djeshëm të krerëve të partive, ku janë biseduar hapat e mëtutjeshëm për veprim.
Në takimin e partnerëve janë marrë vesh që mos t’i tërheqin anëtarët e tyre nga KSHZ.
“LSDM dhe partnerët janë të vendosur se më 5 qershor nuk ka mundësi që të mbahen zgjedhjet e as që do të marrim pjesë në zgjedhje të parregullta. Por, LSDM dhe partnerët e koalicionit do të sigurojnë prezencën e tyre dhe kontrollin e procesit për pastrimin e listës zgjedhore, për t’i penguar manipulimet dhe keqpërdorimet që tenton t’i bëj pushteti i Nikolla Gruevskit” thuhet në njoftimin e LSDM-së.
