“Është e domosdoshme që menjëherë të zhbllokohen proceset demokratike në Maqedoni dhe Gjorge Ivanov menjëherë t’ia ndajë mandatin kryetarit Zoran Zaev për formimin e Qeverisë”, ka deklaruar partia e LSDM-së në njoftimin e rregullt ditor.

Nga kjo parti shtojnë se për shkak të proceseve të bllokuara demokratike, Maqedonia ballafaqohet me probleme të cilat pengojnë qytetarët dhe sistemin e shtetit.

“Bllokimi i tillë, theksojnë do ta arrijë kulmin të hënën kur skadon mandati i kryetarëve të komunave dhe këshillave të komunave. Të punësuarit në komuna, mësimdhënësit, do të mbeten pa paga dhe kompensime. Qytetarët nuk mund t’i marrin shërbimet e nevojshme nga komunat. Në këtë mënyrë, edhe më shumë do të ndërlikohet situata në të cilën gjenden qytetarët e Republikës së Maqedonisë. Për këtë shkak nevojitet transferim urgjent dhe i qetë i pushtetit, me qëllim që Maqedonia sa më shpejtë të fitojë institucione funksionale”.

Nga LSDM apelojnë deri tek të gjithë, përfshirë edhe presidentin Ivanov, që në mënyrë konstruktive të kyçen në proceset demokratike, të veprojnë me përgjegjësi dhe ndërgjegje si dhe të mundësojnë transferim të qetë të pushtetit dhe formim të qeverisë së re reformuese.