Komiteti i Helsinkit për të drejtat e njeriut në R. e Maqedonisë ka përpiluar raport të posaçëm për dhunën dhe rrahjet në Kuvendin e vendit më 27 prill, me të cilin dëshiron të njoftojë opinionin saktë për të gjitha veprat penale, mes të cilave edhe tentim për vrasje.
Njëkohësisht, Komiteti i Helsinkit me raportin nga MPB dhe Prokurorinë Themelore Publike kërkon të niset procedurë para- hetimore për vërtetimin e përgjegjësisë penale për veprat penale që përmendet në raport.
Ky raport i posaçëm ka të bëjë me veprat penale të identifikuara përmes fotografive, materialeve audio dhe video dhe dëshmive të ndryshme si dhe veprat penale për të cilat ka dyshime, por ende nuk është hetuar nëse janë kryer dhe nga kush.
Raporti ka të bëjë edhe me shkeljen e të drejtave dhe lirive të garantuara me Kushtetutë dhe të sanksionuara me Kodin penal. Përmbaj gjithsej 27 vepra penale, prej të cilave për 17 tashmë ka numër të konsiderueshëm të provave dhe dhjetë vepra penale, për të cilat ka dyshime se janë kryer. Aktorët e mundshëm janë ndarë në katër grupe: organizatorë, kryerës, nëpunës policorë dhe eprorët e tyre.
“Roli i organeve ligjvënëse është që të konfirmojnë nëse dhe cilët nga veprat e përmendura penale janë kryer apo ka pasur tentim që të kryhen dhe të mos lejojnë kualifikim të gabuar, përgjithësim të përgjegjësisë dhe sanksionim paushall”, thuhet në raport.
