Më pak se një orë ka zgjatur marrja në pyetje e ish kryeministrit Nikolla Gruevski në Gjykatën Penale ku ai ka thënë se nuk ndjehet fajtor.
Ai tha se veprimet e PSP-së dhe kërkesa për masat ndaj tij janë porositur nga kundërshtari i tij politik, i cili është i vetëdijshëm se nuk e ma mbështetjen e qytetarëve.
“Sot u thirra në gjykatë sepse Katica Janeva ka dyshuar se do ta lëshojë vendin dhe se nuk do të paraqitem në gjykatë. Nuk e di nëse dikush beson në diçka të tillë, apo është veç dëshirë e porositësve të Janevës. Njeriu që tha se nuk e njeh gjykatën është i vetëdijshëm për rejtingun e tij dhe mbështetjen nga populli, prandaj nëpërmes kontrollit që e ka në PSP tenton që mua dhe bashkëpunëtorët e mi të na paraqesë sikur është ai vetë”, tha Gruevski pasi doli nga gjykata.
Kreu i partisë në pushtet nuk deshi të përgjigjet në pyetjet e gazetarëve dhe pas deklaratës u largua me arsyetimin se duhet të shkoj në ngjarje.
Në Gjykatën penale për momentin po zhvillohet marrja në pyetje e kryetarit të komunës Gazi Babë, Toni Trajnovski.
Gruevski, Trajkovski dhe ish ministri i transportit dhe lidhjeve, Mile Janakieski dyshohen në rastin “TNT” për rrënimin e objektit “Kosmos” të biznesmenit Fijat Canoski.
