Marrëveshje mes partive politike, nënshkruese të Marrëveshjes së Przhinos, sipas paralajmërimeve nga pjesëmarrësit e grupeve të punës, do të duhet të ketë sot, në takimin që pritet të filloj prej orës 15, në Klubin e deputetëve në Shkup.
Siç mëson “Meta” çështja e listës zgjedhore është thuajse e kryer ndërsa edhe më tej ka mospajtime të vogla rreth mënyrës së votimit të Diasporës.
Organizata civile “MOST” dje u ftua në takimin e grupeve të punës që të bëj prezantim për mundësinë e regjistrimit aktiv të votuesve.
“Ishim të ftuar vetëm të prezantojmë qëndrimet tona rreth regjistrimit aktiv. Roli jonë është konsultativ. Kur përfunduam prezantimin, e lëshuam takimin” deklaroi kryetari i kësaj Organizate, Darko Aleksovski.
Përfaqësuesit e LSDM-së janë Cvetanka Ivanova dhe Damjan Mançevski ndërsa nga radhët e VMRO DPMNE Nikolla Poposki dhe Nikolla Todorov. BDI do të prezantohet përmes Artan Grubit dhe Musa Xhaferit ndërsa nga PDSH do të merr pjesë vetëm Imer Aliu dhe Bekim Fazliu.
