Специјалната јавна обвинителка, Катица Јанева, денеска соопшти дека ја презела надлежноста и за случајот со убиството на Матин Нешковски.
Таа потврди и дека обвинители на нејзиниот тим утре во Основниот суд Скопје 1 ќе напрват увид и во другите материјали од случајот „Пуч“, кои не ги добиле од обвинителството што претходно постапуваше по нив.
На новинарско прашање дали ќе го преземе и случајот за настаните во Диво Насеље од 9 и од 10 мај минатата година, Јанева одговори дека сите случаи за кои од неа било побарано да ги земе во своја надлежност се во фаза на разгледување.
– Сите случаи се предмет на разгледување. Кога ќе има конкретни информации за нив, ќе бидете известени – изјави Јанева.
