Ова е еден интензивен хибриден напад кој ни се случува од 19 октомври, па до денеска, на територија на целата држава, во средните, а потоа и во основните училишта. Имавме зафатени повеќе од 720 објекти со вакви лажни дојави, иако не само во училишта, туку и во други комерцијални објекти, истакна во гостувањето на ТВ 24 министерот за внатрешни работи, Оливер Спасовски. Тој потенцира дека најважно е тоа што МВР и сите безбедносни служби активно работат на овој проблем, во полн капацитет.
„Дојавите се лажни, безбедноста во ниту еден момент не беше загрозена и во целиот тој период мораше да се постапува по упатствата кои беа во важност целиот тој период”, рече министерот.
Во рамки на Владата формиран е оперативен тим во кој се вклучени Агенција за национална безбедност, Агенција за разузнавање, Агенција за електронски комуникации. Тие бараат соодвтени решенија, за да има поинаков пристап во однос на електронски најави.
„Можам да кажам дека како министер донесов посебно Упатство кое што е за постапување во вакви случаи и врз основа на ова Упатство од петокот минатата недела се работи заедно со училиштата, со Министерството за образование и наука и тука морам да ја истакнам исклучително добрата соработка”, рече министерот Спасовски.
Во однос на откривање на сторители, министерот кажа дека интензивно се работи на тоа.
„Знаете дека во неколку случаи имавме откриени сторители во кои можеше да се дефинира кој е тој кој ги испраќа овие дојави. Сега веќе имаме изолирана поголема група со која работиме и очекувам дека во наредниот период ќе имаме конкретни ефикасни резултати во овој сегмент”, истакна Спасовски.
Тој исто така потенцира дека дојавите на бомби не се случуваат само кај нас, туку дека со истото се соочува и соседна Србија, како и Црна Гора, Хрватска, Босна и Херцеговина, Германија, Нов Зеланд, САД.
„Интензитетот кој се зголемува од руската инвазија врз Украина, доволно говори дека станува за еден спој на структури кои не се само од внатрешноста, од државата, туку и надвор”, рече министерот Спасовски.
За тоа, од каде доаѓаат дојавите, тој кажа дека последните неколку дојави се испраќани од IP адреси од Иран, Русија, како и VPN адреси чии провајдери се исто така од овие држави.
„Интересно е што уплатите за VPN услуги се извршени со крипто валути, што уште повеќе ја отежнува таа откривачка дејност”, истакна тој.
Новото упатство, додаде тој, во кое се третирани сите облици на тероризмот, меѓу кои и електронските дојави за бомби, прави проценка на ризик, а тоа било најважната работа – да се види на какво ниво на ризик се дојавите и врз основа на тоа да се постапува.
Спасовски повика да не се нарушува образовниот процес, да не се создава паника кај учениците, наставниците и граѓаните, бидејќи како што рече, успешно се менаџира целиот процес.
Минатата недела, надлежните министри за внатрешни работи и за образование и наука, заедно со премиерот Димитар Ковачевски, договорија постојани полициски патроли да ги обезбедуват училиштата, како и училишните раководства да следат упатство согласно кое ќе се постапува во деновиве кога ќе стасуваат дојави за бомби.
Со полициски патроли во училиштата ќе се јакне безбедноста во услови на дојави за бомби
