По повод големиот муслимански верски празник Рамазан Бајрам, премиерот Оливер Спасовски упати честитка со која посочи дека оваа година, празникот има посебно значење поради актуелната криза предизвикана од пандемијата на Ковид-19.

„Оваа година Рамазан Бајрам, како празник на обновата на духовната сила којашто ја зајакнува вербата на луѓето во доброто, вистината, правдата и поттикнува желба за меѓусебна почит, разбирање и солидарност. Во овие услови, Рамазан Бајрам не повикува да се соочиме со предизвиците, кои ги носи оваа глобална здравствено-економска криза, и врз начелата на почитување и солидарност да продолжиме заедно по патот што го избравме, здружено и единствени“ – се вели во честитката на премиерот Спасовски.

Во духот на празникот, тој порача граѓаните да бидат одговорни кон себе, кон своето семејство и кон државата, така што ќе ги почитуваат препораките за предострожност и заштита со носење на заштитна опрема и за одржување безбедна физичка дистанца.

Премиерот упати честитка и по повод Денот на сесловенските просветители Свети Кирил и Методиј, посочувајќи дека наследсвото кое ни го оставија Светите браќа нè потсетува и обврзува на потребата од визионерство во организирањето на образовниот процес преку употребата на алатки што ги нуди современата технологија.