„Покрај соодветни постапки за насилниците што влегоа во Собранието, мора да се бара и сериозна командна одговорност и во МВР и за сите припадници што не постапувале и кои не биле во функција на заштита на овие објекти од витално значење на Македонија и во заштита на животот и на здравјето на пратениците во Собранието“, порача пратеникот и генерален секретар на СДСМ, Оливер Спасовски, денеска откако даде исказ во Јавното обвинителство на Република Македонија за насилствата во Собранието на 27 април.

– Очекувам дека Јавното обвинителство на Македонија многу сериозно ќе се зафати со овој настан, при кој имаше упад во еден објект од витално значење за Македонија. Тоа претставува уривање на уставниот поредок на државата и бескомпромисно треба да се бара одговорност од сите. И од тие што се насилнци, тие што организирано во група влегоа во Собранието за да убијат и за да линчуваат пратеници, меѓутоа ќе мора да има сериозна командна одговорност и во МВР – порача Спасовски.

Oдговарајќи на новинарско прашање за изјавата на министерот за внатрешни работи, Агим Нухиу, дека во МВР од 2014 година не се снимале командите, Спасовски рече дека не добил такви информации додека ја вршел првата функција во министерството.

– Не. Јас немав таква информација. Тоа што сега е констатација од министерот, може да го потврди самиот тој или документацијата во МВР – рече поранешниот министер Спасовски.