Одделот за гранични работи при МВР, во текот на годината што е зад нас имаше прилично обемни активности, пред сè, причинети од огромниот наплив на мигранти од земјите на Блискиот и на Среден Исток и од Северна Африка, истакна министерот за внатрешни работи, Оливер Спасовски, по денешната средба со полициските службеници на граничниот премин Деве Баир.
Министерот Спасовски нагласи дека ваквиот зголемен обем на работа бара засилен ангажман на граничната полиција, континуирани мерки и активности не само во поглед на следење на состојбите, туку и за превенирање и за спречување на сите облици на прекуграничен и друг вид криминал.
– Трендовите и согледувањата покажуваат дека и во наредниот период, граничната полиција ја чекаат сериозни предизвици, одговорна и макотрпна работа. Убеден сум дека полициските службеници од одделот за гранични работи соодветно и ефикасно ќе се справат со сите идни предизвици и дека државната граница е во сигурни раце – истакна Спасовски.