Министерот за труд и социјална политика, Диме Спасов, денеска повтори дека Владата нема да ја одложи мерката за социјалното осигурување за лицата со приходи врз основа на договори за дело и на авторски договор.
– Жално е што одредени политички структури со искажување манипулации, невистини и навреди сакаат да добијат лични и политички поени, критикувајќи една позитивна мерка. Владата нема да ја одложи оваа мерка и опфатот на лицата што имаат приходи врз основа на договори за дело и на авторски договор е во интерес на граѓаните на Република Македонија и во интерес на работниците – изјави Спасов.
Според Спасов, оваа мерка има повеќе позитивни аспекти, а со опфатот на авторските договори и на договорите на дело со задолжително социјално осигурување ќе се обезбеди социјална сигурност на голем број работници.
– Во изминатите години се случуваше голем број, илјадници, десетици илјади работници да бидат злоупотребени од работодавците, при што или целосно беа исплаќани преку авторски договор или договор за дело за работите што ги извршуваа. Ако ова продолжи, овие наши граѓани нема да можат да добијат пензија. Овие работници вредно и чесно работат, како и оние работници што се во постојан работен однос. Исто така, се случуваше дел од платата да им се исплаќа како во редовен работен однос, а дел од платата им се исплаќа преку хонорар, односно со авторски договор или договор за дело – истакна Спасов.
Сите оние што не ги исполнуваат условите за старосна пензија од 15 години стаж, ќе имаат можност да доработат за да ги исполнат условите за старосна пензија и да стекнат право.
