Советот на честа при Здружението на новинари изразува загриженост и го осудува непримерниот речник во реакцијата на Кабинетот на Претседателот на РМ, по повод текстот „Иванов во изолација на Водно“.
„Советот смета дека е неприфатливо оваа државна институција во реакцијата потпишана од генералниот секретар, Борис Јосифовски, да користи вокабулар од типот ’Вашите лични фрустрации, комплекси и недостаток на домашно воспитување остануваат само лично ваши’. На овој начин се врши недозволива лична квалификација на претставник на новинарската професија, во случајот на главниот и одговорниот уредник Горан Михајловски, кој, од друга страна, преку својата долгогодишна кариера е докажан професионалец“, пишува во соопштението на ЗНМ.
Од ЗНМ сметаат дека реакцијата е обид за мешање во уредувачката политика, што може да се сфати и како притисок и удар врз загарантираната слобода на информирање.
„Советот на честа го осудува и обидот за потценување на весникот од генералниот секретар на Кабинетот на Претседателот со ’најљубезната препорака’ која ја упатува до весникот – сериозните теми да ги оставите на сериозни медиуми, а вие да продолжите да се занимавате со вашите теми, својствени на вашиот медиум“, пишува во соопштението на здружението.