Агенцијата за храна и ветеринарство (АХВ) ја отфрли претставката поднесена од ЈП „Лајка“, во која претпријатието бараше да се санкционира човекот кој пред еден месец покрај контејнерите во населбата Расадник во Кисела Вода, оставил петмесечно куче – малтезер, во неговото креветче.
Болното куче почина кратко време откако беше преземено од ЈП „Лајка“.
Со оглед на тоа што претставници на здруженијата за заштита на животните, а откако случајот се рашири низ социјалните мрежи, имаа информации кој е сопственикот на кучето, беше поднесена претставка до Агенцијата за храна и ветеринарство, со барање тој да одговара за напуштање миленик.
АХВ, како што може да се види од одговорот, ја одбил претставката поради немање доволно докази.
Токму напуштањето на домашните миленици се посочува како најголем проблем во државата за зголемување на бројот на уличните кучиња. Од здружението „Анима Мунди“ реагираат на одлуката на АХВ.
„Кученцето имало завој на предната нога со што е јасен знак дека непосредно пред исфрлањето било терапирано и е утврдено дека со таа симптоматологија е примено куче ден претходно во една приватна ветеринарна амбуланта, каде што се сомневале на болеста парвовироза, од причина што на сопствениците пред неколку месеци им починал уште еден домашен миленик од истата болест. Дента кога кученцето угинува сопствениците по реакциите на социјалните мрежи дошле во ЈП „Лајка“ за да прашаат за состојбата, образложиле дека имале семејни проблеми и лекувањето би им бил финансиски товар па решиле да го фрлат покрај контејнер“, велат од „Анима Мунди“.
Од здружението бараат АХВ поефикасно да делува во однос на санкционирањето на несовесните сопственици на домашни миленици.
„Тие воопшто не се потрудиле да спроведат било каква истрага и да го санкционираат сопственикот на кој практично поради негрижа му умираат две кучиња, од кои едното фрлено да умира покрај контејнер за отпадоци и претставката ја отфрлаат како неоснована. Што е тоа што ќе ве допре доволно, ако не случај на напуштање на миленик на најгрозен начин, како ѓубре во момент кога сопственикот му е најпотребен да му пружи нега и помош? Колку изгубени животи треба да има за конечно да почне да се имплементира Законот за заштита и благосостојба на животните?“, реагираат од „Анима Мунди“.
Директорот на АХВ, Николче Бабовски за Мета.мк изјави дека за случајот ќе се произнесе утре.
