Времето во Македонија денеска ќе биде сончево и многу топло, со мала до умерена облачност. Ќе дува слаб, а во западните делови од земјава умерен ветер од јужен и од југозападен правец, вели прогнозата на Управата за хидрометеоролошки работи.
УВ-индексот ќе биде 9.
Температурата ќе достигне максимум 38 Целзиусови степени во југоисточните предели од земјава. Еден степен помалку прогнозира УХМР за централниот дел на земјата, а 36 Целзиусови степени ќе биде максималната температура во Скопје.
Во Пелагонија се очекува температурен максимум од 35 Целзиусови степени, 32 степени во Охридско-струшкиот Регион, а 33 степени се очекуваат на крајниот североисток на земјава. На западот на Македонија максималната температура ќе биде околу 29 степени.
Од утре до сабота се очекува многу висока температура. Долж Повардарието максималната температура ќе надмине 40 Целзиусови степени.
В четврток ќе дува засилен југозападен ветер. В недела попладне и во текот на ноќта кон понеделник, поради брз продор на влажна и посвежа воздушна маса од север, ќе има врнежи од дожд и грмежи, а од понеделник и значително опаѓање на температурата.
