Фото: Kaihsu Tai - Own work, CC BY-SA 4.0, https://commons.wikimedia.org/w/index.php?curid=118861346

Остри реакции од бугарските власти по одлуката на Холандија да го блокира пристапот на Бугарија во европската Шенген зона, пишува Бугарското национално радио. Вчера владата на холандскиот премиер Марк Руте објави дека ќе се согласи со прием на Романија и Хрватска во Шенген зоната, но ќе го блокира приемот на Бугарија. Холандија стави вето поради тоа што Бугарија не успеала да постигне задоволителни резултати во борбата против корупцијата и организираниот криминал.

Прифаќањето на нови членки во Шенген зоната бара едногласност од сите земји-членки на ЕУ.

„Наместо европска солидарност, Бугарија добива цинизам“, напиша бугарскиот претседател Румен Радев на Фејсбук.

„Нашите напори не заслужуваат занемарување! Нашите напори не заслужуваат навреди“, изјави бугарскиот министер за внатрешни работи, Иван Демерџиев.

Министерот за правда Крум Зарков пак вели дека Холандија нема право да не ја сака Бугарија во Шенген и за него ова е апсолутно неприфатлив, политички и правно неоснован чекор.

Австрија, исто така, изрази резерва за членството на Бугарија во Шенген зоната. Канцеларот Карл Нехамер изјави дека неговата земја го поддржува членството на Хрватска, но е против приемот на Бугарија и Романија.

Европската комисија неколку пати соопшти дека Бугарија, Романија и Хрватска ги исполнуваат критериумите и се подготвени за членство во Шенген зоната. Европскиот парламент повика земјите да бидат прифатени во зоната без натамошно одлагање.

Шенген зоната им овозможува на луѓето слободно да се движат, без проверка на идентитетот. Во Шенген зоната има 26 земји-членки, од кои четири не се дел од ЕУ.

Инаку, холандскиот министер за надворешни работи Вопке Хоекстра по владиниот состанок изјави дека е „прерано“ да се постигне согласност за пристапување на Бугарија. Тој не ја исклучи можноста Холандија да ја преиспита својата одлука кога ќе стане јасно дека Бугарија е способна да се бори против корупцијата и организираниот криминал.

Одлуката да не се поддржи влезот на Бугарија во Шенген не е политичка, изјави холандскиот премиер Марк Руте, додавајќи оти таа се заснова на факти.