Центарот за европски интеграции (ЦЕИ) при Институт за демократија „Социетас Цивилис“ – Скопје (ИДСЦС) денеска изрази загриженост за заклучокот на Европскиот Совет да не одреди датум за пристапните преговори со Северна Македонија, порачувајќи дека таквата одлука реално ги влошува состојбите и го нарушува кредибилитетот на ЕУ.
„ЦЕИ на ИДСЦС смета дека со одложување на почетокот на пристапните преговори, кредибилитетот на Европската Унија пред граѓаните и општествено-политичките чинители во Северна Македонија и регионот ќе биде ставен под прашање. Дополнително, прогресот направен во исполнувањето на реформите, како и добрососедските односи не е неповратен. Недавањето на датум за преговори може да придонесе кон нарушување на одржливоста на овие важни процеси не само во Северна Македонија, туку и во регионот. Оттука, потребно е Советот да донесе конечна одлука во октомври со одредување на конкретен датум за прва меѓувладина конференција. Ваквиот чекор на Советот позитивно ќе влијае на градење на внатрешната кохезија во државата нарушена по потпишувањето на договорите со Бугарија и Грција“, се вели во соопштението.
Центарот за европски интеграции на ИДСЦС ги повикува Владата, останатите државни институции, како и опозицијата да продолжат да работат на исполнување на реформите во насока на надминување на проблемите поврзани со владеењето на правото и борбата против корупција и организиран криминал.
„Особен фокус е потребен во постигнување на национален, натпартиски консензус за Законот за Специјалното Јавно Обвинителство. Дотолку повеќе, ИДСЦС и ЦЕИ ја повикуваат Владата да ја обелодени преговарачката структура и да го води овој, пред се, општествен процес транспарентно и отчетно“, се вели во соопштението.
