Со рушење на хотелскиот објект „Грин спејс“, денеска во Охрид продолжи акцијата за отстранување на бесправно изградените објекти на охридското крајбрежје. Со учество на претставници од локалниот и од државниот градежен инспекторат во Охрид, акцијата за рушење на дивоградбите продолжи со уривање на хотелскиот објект лоциран во близина на езерскиот брег, непосредно до стариот пат за Струга.

„Отстранувањето на нелегално изградените објекти се одвива согласно Планот за управување со Охридскиот регион, кој произлегува од барањата на Реактивната мисија на УНЕСКО, а за зачувување на универзалните вредности на заштитеното светско природно и културното наследство на Охрид“, информираат од локалната самоуправа од Охрид.

Евроамбасадорот Самуел Жогар при неговата неодамнешна посета на Охрид го поддржа охридскиот градоначалник во отстранувањето на незаконски изградените објекти на охридското крајбрежје.

Општина Охрид во изминатиов период отпочна со рушење на дивоградбите што беа изградени на охридските плажи, за на нивно место да постави речен песок што беше препорачан од УНЕСКО. Нивниот став е дека ставањето ред на крајбрежјето и стопирањето на нелегалната урбанизација се единствениот пат да се зачува статусот на Охрид и Охридското езеро на листата на УНЕСКО.