Со портокалови огромни прашалници, поставени на плоштад „Македонија“ и пред ЈУ Дом на културата „Кочо Рацин“ во Скопје, активистите од Младинскиот образовен форум прашаа „Ќе се дише ли зимава“?
Оваа иницијатива, како што соопштија од МОФ, има за цел да ја подигне свеста на институциите во однос на сите прашања поврзани со животната средина и да побуди критичко размислување за одговорностите на одредени носители на одлуки и преземањето конкретни мерки и чекори за совладување на овие клучни проблеми кои ги засегаат сите.
„Според стратешката програма на владата за намалување на аерозагадувањето, односно планот за чист воздух од периодот 2019-2020, за прв пат се издвојуваат посебни буџетски средства исклучиво за намалување на аерозагадувањето. За оваа намена беа обезбедени дополнителни 1.5 милиони евра. Згора на се, оваа програма имаше план да го намали аерозагадувањето во Скопје до 50%, додека во другите градови коишто се засегнати повеќе од некои други, намалувањето е помеѓу 30% и 50%. Начинот на финансирање на активностите беше со почетен посебен фонд од 1.5 милиони евра и овие средства се дополнителни, покрај оние што постојат за различни активности на различни министерства поврзани со заштита на животната средина во висина од 20 милиони евра“, истакнаа од МОФ.
Идејата за герила акцијата, фокусирана на аерозагадувањето и проблемот со воздухот во градот беше поттикнат од младите активисти од средношколските клубови на МОФ.
Иницијативата е дел од проектот „Креативна младинска акција за животна средина“, поддржан од Фондација Отворено Општество – Македонија. Содржината е единствена одговорност на авторот и не нужно ги изразува ставовите на Фондација Отворено општество – Македонија.
