Потреси на мозок и други повреди добиле снимателот и новинарот на „А1он“, Влатко Желчески и Александар Тодески, кои вчера на крајот на протестот организиран од иницијативата „За заедничка Македонија“ беа брутално претепани од петмина насилници, потврди Тодески за „Мета“.

И обајцата се пуштени на домашно лекување откако ја минаа ноќта во Ургентен центар.

– Во моментов наодите од болница се носат во полициска станица, а секако ќе поднесеме тужби – изјави Тодески.

Порталот „А1он“ тужбите ги најави уште вчера, а неколку часа по кукавичкиот напад, министерот за внатрешни работи, Агим Нухиу, го информирал Здружението на новинарите на Македонија дека има приведени.

Петмина учесници на протестот, на крајот на собирот, ги нападнале снимателот Желчески и новинарот Тодески додека ги изведувале работните задачи за известување од протестот настанот. Напаѓачите ја скршиле камерата на „А1он“, а Желчески и Тодески потоа со возило на брза помош беа пренесени во Ургентниот центар.