На 22 април, во Македонија ќе допатуваат членовите на работната група на Советот на Европската унија, задолжена за Западен Балкан, потврдуваат службите во Брисел.
Посетата на претставниците на Советот е дополнителен знак на загриженост на ЕУ за политичката криза во Македонија, бидејќи таа е на директен предлог на земјите-членки на ЕУ.
Македонија, најверојатно, ќе се спомене и во заклучоците на следниот Совет на министрите за надворешни работи на ЕУ, кој ќе се одржи на 20 и на 21 април во Луксембург.
Предлогот Македонија да биде дел од заклучоците доаѓа од земји како Словенија, Шведска и Бугарија.
Според дипломатите на земјите-членки, ЕУ губи трпение поради Македонија.
Во текот на оваа недела би требало да стане појасно што ќе содржат претстојните заклучоци на Советот.
