Собранието, пред одлуката за распуштање, што во средата доцна вечерта ја соопшти претседателот на законодавниот дом, Трајко Вељноски, не ги заврши обврските кон СЈО.
Пратениците не ја ни разгледаа иницијативата на СЈО за измени на Законот за заштита на сведоци, а не беа усвоени ниту препораките на Венецијанската комисија околу законот за приватноста и за свиркачите.
Обвинителката во СЈО, Ленче Ристовска, не сака да ги коментира актуелните политички случувања.
– Дали ги исполниле или не своите обврски, тоа треба тие да го кажат. Должност е на институциите да соработуваат со Специјалното јавно обвинителство, но дали тоа го исполнуваат, нема да коментираме – вели Ристовска.
Лидерот на опозицијата вчера, одговарајќи на новинарско прашање, рече дека не би му било чудно доколку Уставниот суд поведе постапка за укинување на СЈО.
– Груевски и сè е можно. Не би сакал да верувам дека такво безобразие ќе се случи, но уште еднаш велам, Груевски и сè е можно – рече Заев.
