Асошиетед прес (АП) и Си-Ен-Ен јавија за победата на Зоран Милановиќ на претседателските избори во Хрватска, кој ќе продолжи да владее во следните пет години, а кој, како што објавуваат, е опозициски критичар на Европската унија и на НАТО, пренесува Н1. Тој освоил повеќе од 74 отсто од гласовите и 1.122.859 гласови во споредба со противкандидатот на ХДЗ, Драган Приморац, кој добил 25 отсто од гласовите.
АП пишува дека резултатот е голем поттик за Милановиќ, кој е критичар на западната воена поддршка за Украина во војната против Русија, пренесува Индекс.
„Милановиќ е и жесток противник на хрватскиот конзервативен премиер Андреј Пленковиќ и неговата влада“, додаваат тие.
Во својот говор по објавувањето на резултатите, Милановиќ кажал дека неговата победа е знак на одобрување и доверба на гласачите, но и порака „за состојбата на земјата за оние кои треба да ја слушнат“. Барам од нив (владата) да слуша. Тоа сакаа да го кажат граѓаните. Ова не е само поддршка за мене“, рече Милановиќ.
„Го споредуваат со Трамп“
АП пишува дека Милановиќ (58) е најпопуларниот политичар во Хрватска, а поради неговиот борбен стил на комуникација со политичките противници понекогаш го споредуваат со новоизбраниот американски претседател Доналд Трамп.
АП објави дека изборите се одржале додека Хрватска, која има 3,8 милиони жители, се бори со висока инфлација, корупциски скандали и недостиг на работна сила. По гласањето, Милановиќ повторно ја критикуваше ЕУ дека е „недемократска во многу аспекти“ и дека ја водат неизбрани функционери.
„Ставот на ЕУ дека „ако не мислите како мене, тогаш сте непријател“ е еднакво на „психолошко насилство“, рече Милановиќ.
„Тоа не е модерна Европа во која сакам да живеам и работам. Ќе работам да го сменам тоа, колку што можам како претседател на една мала нација“, додаде тој.