Амбасадорите на САД и на ЕУ, Џес Бејли и Аиво Орав, денеска излегоа со заедничка изјава за распуштањето на Собранието и за најавениот бојкот на изборите од опозициските партии.

Во заедничката изјава, Бејли и Орав рекоа дека одреден прогрес во поглед на создавање услови за веродостојни избори е направен, но дека сè уште има многу работа, а на 6 април партиите пропуштиле можност да подготват веродостојни избори.

„ЕУ и САД ги поддржуваат сите партии и другите учесници во процесот во нивната работа за создавање услови за веродостојни избори. Ова подразбира прочистување на избирачкиот список, спречување на каква било форма на заплашување или притисок врз гласачите и обезбедување на фер медиумско покривање. Извесен прогрес е направен на овие полиња, но останува уште многу работа. Одговорност е, не само на државните институции да подготват веродостојни избори, туку и на политичките партии. На 6 април се пропушти таква можност“, стои во заедничката изјава.

Кој пропуштил можност за подготовка на веродостојни избори? Владата? Партијата на власт? Собранието? ДИК? Опозицијата? Тоа  во соопштението не е прецизно кажано. Нејасно е и дали ова се однесува на распуштањето на Собранието и на бетонирањето на датумот за избори или, пак, на најавата на лидерот на СДСМ, Зоран Заев, за бојкот на изборите.

Вечерта на 6 април претседателот на Собранието, Трајко Вељаноски, го распушти законодавниот дом, а Заев на прес-конференција најави дека СДСМ и здружената опозиција ќе ги бојкотираат изборите.

Се обидовме од ВМРО-ДПМНЕ и од СДСМ  да добиеме одговор како тие ја толкуваат изјавата на амбасадорите, но одговор не добивме.