Во новото издание на емисијата „Шорткат“ ве запознаваме со Планетариумот во МКЦ, кој претставува место за сите оние што сакаат да научат нешто повеќе за ѕвездите и планетите. По двегодишна пауза, Планетариумот почна со работа минатиот месец, а најголем интерес за посета и запознавање со ѕвездите има од страна на најмладите. За начинот на кој се одвиваат проекциите, но и за тоа каде во Македонија може најдобро да се види чисто ноќно небо без светлосно загадување, ни кажуваат предавачите Моника и Радан.
Ве информираме и за барањата на Сојузот на средношколците да бидат вклучени во изнаоѓањето решенија за надоместување на пропуштениот материјал поради штрајкот на наставниците, но и за дигитализацијата на високото образование за која се зборуваше на тркалезната маса организирана од Младинскиот образовен форум (МОФ).
Ја пренесуваме и веста дека од 1 мај повторно се враќат бесплатните билети за патување со воз за студентите, средношколците и сите млади лица.
Новото издание на нашите вести за млади ќе биде објавено вечерва во 19:00 часот.