Градот во текот на годинава засади околу 8.000 дрвни садници вклучувајќи ја есенската акција за засадување дрвја, која е во тек и во чии рамки ќе се засадат 3.500 листопадни садници, информираат од Град Скопје.
Градските власти годинава работеа на обновување на дрвореди во Ѓорче Петров, Сарај, на улицата Франклин Рузвелт, на Бит-пазар, на булеварот Митрополит Теодосиј Гологанов и на други локации, а се пофалија и со хортикултурно уредување на нови и реконструирање на постојни зелени површини од околу 128.000 квадратни метри.
Иако најавена, за наредната година останува реализацијата на ветувањето на градоначалникот на Скопје, Петре Шилегов за создавање на таканаречените зелени коридори кај реките Лепенец и Серава, кои, според изјавата на Шилегов за „Мета“, како проекти се извадени од фиока за време на неговиот мандат по цели 30 години.
„Годинава се изработени студии за воспоставување зелени коридори по должината на коритата на реките Серава и Лепенец, а за следната година Градот Скопје предвиде средства за изработка на техничка документација за нивна изведба“, се вели во информацијата од Град Скопје.
Оттаму истакнуваат дека воспоставувањето зелени коридори по должината на речните корита на Серава и на Лепенец ќе овозможи прилив на свеж воздух во градот, заштита на водните живеалишта како и уредени катчиња за рекреација.
Враќање на изгубениот дрвен фонд во централното градско подрачје на Скопје беше на листата барања кои еколошките здруженија, предводени од О2 Коалицијата, на кои скопскиот градоначалник Шилегов со потпис се обврза уште како кандидат пред локалните избори 2017 година. Овие барања се објавени на сајтот Мој воздух, во посебен дел наречен Политички бројач на кој се регистрира колку од ветувањата на градоначалникот се исполнети. Реализацијата на оваа обврска на Шилегов е означена како „започната“.
Масовното, стратешко зазеленување со мултифункционални видови, побарано со овој документ предвидува планско и стручно засадување „со видови кои максимално апсорбираат загадувачки супстанци, како тешки метали, бензен, PM, NOx, CO, SO2, VOC, а се соодветни на климатските промени и услови на Град Скопје, отпорни на болести, суша, силни поројни дождови, силни ветрови, многу ниски и многу високи температури и со очекуван ефект на спуштање на температурата“, во жешките урбани острови со соодветно зазеленување.
Ветување дека ќе го стопира исчезнувањето на зеленилото под налетот на урбанизацијата има и во предизборната програма на Шилегов. Сепак, годинава јавноста беше сведок на натамошно интензивно урбанизирање токму на постојни зелени површини во централното градско подрачје.
