Откако ќе завршат преговорите на работните групи за решавање на проблемите во медиумите, политичките партии ќе почнат разговори за судовите, рече Петре Шилегов, одговарајќи на новинарско прашање на прес-конференцијата пред Владата.
– Избирањето на претседатели на судовите денеска само зборува за дволичноста на ВМРО-ДПМНЕ во фазата на разговори и преговори за надминување на политичката криза. Денеска се избира претседател на скопска апелација, претседател на Основниот суд во Струмица и неколку други основни судови, во услови кога договорено е да биде отворено и прашањето за работата на судовите уште со потпишување на јунскиот договор и кога е извесно дека по завршувањето на темата за преговори за медиумите, следното прашање што ќе се отвара за преговори е прашањето за судовите – одговори Шилегов.
Тој рече и дека е очигледно дека ВМРО-ДПМНЕ едно зборува, друго работи зад грбот на македонската јавност, како што покажува и случајот со Рамковниот договор.
