Партиите и понатаму тактизираат и се натегаат околу одржувањето нова рунда лидерски средби, на кои би се договарале идните чекори за расплет на кризата и, евентуално, нов рок за изборите.
Во таа насока се и најновите изјави на претставниците на партиите, кои се движат од „треба да се почне“ до „нема потреба од средба“, како и вообичаената надеж што ја изразува Брисел дека, сепак, до крајот на неделава ќе дојде до средба.
Во отсуство на вистински информации дали се преговара за да се преговара, кој ќе посредува на средбата и во каков формат таа би се одржала, партиите продолжуваат да се надмудруваат и да се навредуваат.
Во моменов ова се позициите:
ВМРО-ДПМНЕ: Партијата би присуствувала на лидерска средба, но претходно мора да ја знаат темата и планот за средбата.
Никола Груевски: „Досега никој не нè контактирал за одржување на лидерска средба. Ние, секако, би прифатиле, но добро е да има претходни договори и подготовки околу темата на средбата затоа што за граѓаните не е добро да се одржуваат лидерски средби, без претходно добро подготвен план и тема, особено затоа што секогаш нас нè обвинуваат ако пропадне средбата. Во моментов нема ниту иницијатива, ниту тема за одржување лидерска средба“;
СДСМ: Веќе треба да се почне со преговори и со договарање на условите за да може наесен да се организираат фер и демократски избори.
Петре Шилегов: „Никола Груевски и ВМРО-ДПМНЕ и порано, а и сега едно прават, а друго зборуваат. Груевски лаже и не сака да преговара. Не сака да преговара, затоа што не сака да се создадат услови за фер и демократски избори. Ним им одговара оваа ситуација во која сега се наоѓа државата“;
ДПА: Лидерската средба нема што да понуди за излез од кризата и таква средба би била несериозна.
Мендух Тачи: „Решението за оваа криза го гледам во договорот меѓу Македонците и Албанците, кој е дел од платформата на ДПА. Доколку не се седне сериозно да се разговара за реалните проблеми, можно е ДПА да излезе од секакви преговори за решавање на политичката криза“;
ДУИ: Лидерски средби треба да се одржуваат затоа што се во интерес на граѓаните, а за фер избори најпрво мора да се создаде политички амбиент.
Брисел: Делегацијата на ЕУ е во постојан контакт со партиите и се надеваме дека тие ќе се согласат да се сретнат оваа недела.
