Битолското јавно обвинителство поднесе Обвинителен предлог против пет лица и против јавната установа Национален парк „Пелистер“ – Битола за кривично дело Пустошење шума од член 226 од Кривичниот законик. Обвинение е поднесено и против одговорно лице, в.д. директор на НП „Пелистер“ кој се товари за кривично дело несовесно работење.
Според обвинителниот предлог, во периодот од крајот на септември 2023 година до 09.10.2023 година, во близина на место викано „Голема ливада“ во рамките на Националниот парк Пелистер, петмината, во име и за сметка на обвинетото правно лице кое стопанисува со НП Пелистер, спротивно на Законот за шумите, сечеле шума во националниот парк.
Врз основа на усна наредба на двајцата првообвинети, останатите тројца шумски работници, без претходно одобрение и извршен преглед на ознаката за сеча од овластен инспектор за шумарство од Државниот инспекторат за шумарство, од националниот парк бесправно исекле 85 стебла молика и 24 стебла ела во вкупна количина на дрвна маса од 168.63 кубни метри, со намена за нивна продажба како дрвна маса во име и за сметка на обвинетото правно лице ЈУ Национален парк Пелистер.
„Последниот обвинет, како в.д. директор на ЈУ Национален парк Пелистер Битола, од небрежност, со пропуштање на должен надзор очигледно несовесно постапувал при вршење на своите овластувања и должности и не ја обезбедил законитоста и соодветно управување во работењето на Националниот парк Пелистер. Тој бесправно исечените дрвја и друга дрвна маса за која нема доказ дека е сечена согласно Закон ги продавал во име и за сметка на ЈУ Национален парк Пелистер Битола како техничка дрвна маса на три правни лица, со што обвинетиот прибавил имотна корист на ЈУ Национален парк Пелистер Битола во износ од 1.752.287 денари“, соопшти Јавното обвинителство.
