Во моментот 44 деца од градинките во државата се во изолација, откако се утврдило дека биле во контакт со заболени со ковид-19. Меѓутоа, како што оцени министерката за труд и социјална политика, Јагода Шахпаска, заболените деца заразата не ја добиле во градинките, заболените вработени во голем дел се вратени на работа, а состојбата е под контрола.

„Не по секоја цена ќе ги чуваме градинките отворени, ако видиме дека бројот на позитивни се зголемува. Здравствената состојба на 15 дечиња кои заболеа од 9 септември до 15 октомври и на 45 вработени е добра, што говори дека состојбата е под контрола“ изјави министерката Шахпаска.

Таа објасни дека секој ден напладне се прави пресек на здравствената состојба во сите градинки во Македонија, а секој петок таксативен преглед и се праќа до Комисијата за заразни болести, која одлучува дали ќе продолжат градинките со работа или не.

Шахпаска денеска присуствуваше на дебата за работнички права во Штип, каде зборуваше и директорот на Државниот трудов инспекторат, Алајдин Хавзиу, кој се пожали дека и тие се погодени од пандемијата. Тројца инспектори во моментов се на боледување, поради тоа што се позитивни на ковид-19, како и еден трудов инспектор во Град Скопје.