Министерството за здравство информира дека утрово на Клиниката за инфективни болести и фебрилни состојби во Скопје починал еден пациент на 79 години од Дебар. Пациентот бил дијагностициран позитивен на Ковид-19 на 23 март, а со влошена здравствена состојба хоспитализиран на клиниката во Скопје на 25 март. Ова е седма жртва од корона вирусот во нашата земја.
„Во изминатите 24 часа се регистрирани 26 нови случаи на корона вирус во земјата. Целосен преглед за состојбата по градови ќе испратиме дополнително бидејќи дел од потврдените се со работа во Скопје, но место на живеење во друг град, а анкетите се сѐ уште во тек“, се вели во соопштението на Министерството за здравство.
Со ова, вкупната бројка на дијагностицирани пациенти со КОВИД-19 во нашата земја денеска до 12 часот e 285 лица.
Денеска од Клиниката за инфективни болести и фебрилни состојби во Скопје биле испишани 9 пациенти (8 од Дебар и 1 од Скопје), кои на двата контролни теста на Ковид-19 имале негативен резултат. Нивната здравствена состојба е добра и тие си заминале дома, информираат од Министерството за здравство.
