Семејството на К.К., седмоодделенецот кој со пиштолот на неговиот татко во основното училиште „Владислав Рибникар“ во Врачар, Белград, уби 10 и повреди уште пет лица, по повеќе од 20 дена од масакрот, упатило сочувство до сите семејства на загинатите, пренесува Н1.
„На тој 3 мај завладеа вечна тишина во која секој ден немо плачеме од неизлечива болка и тага за секое невино дете што загина и за Драган, кој со толку љубов се грижеше за децата. Длабоко и искрено жалиме и упатуваме сочувство до секое семејство за нивната загуба, што е и наша загуба. Вечно во тага“, изјавиле од семејството, а пренела адвокатската канцеларија што ги застапува.
Нивниот син К.К., тринаесетгодишен ученик од седмо одделение, утрото на 3 мај на училиште со огнено оружје уби осум ученици и училишниот чувар Драган, а рани уште шест лица. Една од ранетите ученички, со тешки повреди на главата, им подлегна на повредите на 15 мај.
Државниот секретар во Министерството за здравство, Мирсад Џерлек, денеска изјави дека едно од повредените момчиња во масакрот во Белград, со сериозни повреди на вратот и на р’бетот, најверојатно ќе го продолжи лекувањето во Чикаго, САД.
Мајката на момчето беше сослушана во Вишото јавно обвинителство и сè уште е неизвесно дали таа ќе одговара за случајот. Таткото на К.К., со чие оружје беше пукано, се наоѓа во притвор, додека детето е под надзор во психијатриска установа.
