Математичкиот генијалец Или Морина, чија сторија ја објави Мета.мк во 36-тата епизода на „Шорткат“, наскоро ќе добие своја математичка емисија на втората програма на Македонската радио телевизија.
Тој веќе ја сподели со јавноста првата пилот емисија, а од септември, како што изјави за Мета.мк неговата мајка Имране, ќе продолжат снимањата и ќе следува цел серијал од околу 16 епизоди.
13-годишниот Или до сега своето знаење го пренесуваше преку неговиот Јутјуб канал, а и во директна комуникација подучуваше студенти од земјава и странство.
Претседателот Пендаровски го запозна математичкиот гениј Или Морина
Од објавувањето на сторијата за Или па до сега, младиот гениј имаше средба и со претседателот на државата Стево Пендаровски и со министерот за образование и наука Јетон Шаќири. Со нив разговараше за неговите успеси, но и за потребата од реформи во образованието, вклучувајќи адаптирана образовна програма која е неопходна за напредок на учениците кои веќе брилираат во одредена наука.
Или Морина, како што веќе објави Мета.мк, своето образование ќе го продолжи во приватно училиште.
