Охриѓани, особено еколозите, покажаа голем интерес за измените на Генералниот урбанистички план за градот Охрид, што го изработува проектантската куќа „Полог проект“ од Гостивар. Тие побараа одговори од надлежните во Општината и од изработувачот, да кажат дали постои Студенчишкото блато, кои се неговите граници и дали при подготвувањето на документацијата за овој дел се почитувани домашните и меѓународните конвенции.
Станува збор за површина 70 хектари, од кои само 13 хектари се земјиште на Република Македонија. Сопствениците на имоти на шеесетина хектари, кои сега се претворена во ниви, бавчи, овоштарници и слично, исто така, бараат од надлежните во урбанизмот конечно по децении блокада да им дадат можност да го искористат својот имот, да го ефектуираат и од него да заработат. Тоа, пак, не се совпаѓа со заложбите на еколозите. Овоштарниците и земјоделските култури се ѓубрат со соодветни ѓубрива кои се штетни за флората и за фауната на тој простор.
Локалната самоуправа изработила студија за да се утврдат границите на блатото, со десетина хектари заштитен простор. Советот на Општина Охрид ја одобрил и била доставена до Министерството за животна средина и просторно планирање во понатамошна постапка за утврдување на еден дел од блатото како споменик на природата. Министерството за животна средина ја проследи студијата до Владата, која, пак, со заклучок ја врати за да се ревидира и да се одреди оној дел што навистина треба да се ревитализира.
Од „Полог проект“ од Гостивар појаснуваат дека во никој случај, со новите измени нема да биде загрозено блатото, иако засега не е дефинирано како строго заштитена зона. Ветуваат дека по дефинирањето на статусот, блатото ќе го добие соодветниот третман.
Бранко Арнаудов, заменик-раководител во секторот за урбанизам при Општина Охрид, дел од Студенчишкото блато сè уште постои, но треба да се утврдат точните граници на оваа природна реткост.
– Интензивното уништување на блатото е почнато во 70-тите години на минатиот век, со негово претворање во градска депонија бидејќи таму е депонирано огромно количество градежен шут и комунален отпад. При утврдувањето на локацијата за изградба на дендролошкиот расадник во 90-тите години, беа повикани сите експерти од Министерство за земјоделство, од Земјоделскиот факултет, професори, доктори на науки и уште тогаш се утврди дека најголемиот дел од блатото со депонирање на таквиот вид отпад е уништено и постојните канали немаат вода, а да не зборуваме воопшто за флора и за фауна на тој простор – појаснува Арнаудов.
Дејан Пановски од Министерството за животна средина и просторно планирање го апострофира ставот на Владата која го признава постоењето на Студенчишкото блато и бара остатокот да се заштити.
– Владата со заклучок донесен врз основа на студијата признава постоење на Студенчишкото блато. Со документ, со заклучок бара од Општината да утврди граници на строга граница и Општината да се однесува со тој заштитен сегмент според сите домашни и меѓународни конвенции. Тоа е најважниот момент. Потоа, при донесување на Деталниот урбанистички план, треба првенствено да се води сметка за еколошкиот сегмент односно за заштитата на Охридско Езеро и, притоа, да се инкорпорираат барањата на Владата – вели Пановски.
Строга заштита на Студенчишкото блато на последната седница на Советот на Општина Охрид, на 13 март, побараа опозициските партии, но нивната иницијатива за отворање поопширна дебата за урбанизацијата на блатото не беше прифатена од Советот.
