„Гувернерот Богов на крајно нетранспарентен начин даде дозвола да се продаде „Алфа банка“ за 1,2 милиони евра на швајцарски фонд, чиј претседател на управен oдбор се јавува и како основач на компанија што соработувала со Владата предводена од Никола Груевски“, обвинуваат од опозицискиот СДСМ.
Оттаму потсетуваат дека пред само 30 дена, од кабинетот на гувернерот Богов беше кажано дека „нема поднесено барање за купопродажба на акциите на „Алфа банка“ и дека доколку такво барање биде пристигнато, јавноста ќе биде известена за него“.
– По 30 дена молк, не само што не беше известена јавноста, туку денеска на Македонската берза преку блок-трансакција се продадени 100 проценти од акциите на „Алфа банка“ – АД Скопје за 1,2 милиони евра. Богов е должен да ѝ одговори на јавноста зошто на таинствен и нетранспарентен начин дозволи продажба на „Алфа банка“ – АД Скопје – додаваат од СДСМ.
